أبو الغالي يخرج عن صمته ويقول كل شيء قبل مؤتمر البام

أبو الغالي يخرج عن صمته ويقول كل شيء قبل مؤتمر البام

الوسط

صلاح ابو الغالي، الإطار السياسي الذي له مكانته الخاصة بحزب البام،  وعضو المكتب السياسي لحزب الاصالة والمعاصرة والبرلماني ورئيس المجلس البلدي لمديونة طالع ليه الدم. مقلق من هاد الشي اللي واقع فحزبو. مقلق من صمت هاد الحزب اللي دوز فيه 15 عام. بيه دخل للسياسة. فيه لقى المبادئ ديالو.

ابو الغالي خلى فتصريحو لموقع ”كود”٬ كاع الاحتمالات حول ترشحو لمنصب الامين العام. قال باللي “كلشي ممكن”. للي حاسم فيه رئيس المجلس البلدي لمديونة فتصريحو ل”كود” هو موقفو من ولاية جديدة للامين العام المنتهية ولايتو عبد اللطيف وهبي. فقد قال ل”كود” باللي “ماشي راجل المرحلة نهائيا”. علاش؟ حسب ابو الغالي فتصريحو ل”كود” “وهبي اللي ديما كيهدر٬ ضربها بسقلة. ما هدرش فالوقت اللي حزبو كيعيش زلزال. حسب ابو الغالي ل”كود” فالامين العام الحالي ما دافعش على الحزب. ما دافعش على مشروع الحزب. وباللي من حقو يترشح ولكن كقيادي هو كيعتابر الترشيح ضد مصلحة “البام”

حسب تحليل عضو المكتب السياسي فتصريحو ل”كود” “اللي واقع فالحزب راه زلزال ماشي غير سحابة”. الملفات اللي معروضة على القضاء بحال قضية اسكوبار افريقيا٬ وللي 2 قياديين من البام متهمين فيها واحد رئيس الجهة الشرقية٬ قال عليها باللي كاينة ثقة فالعدالة٬ ولكن استغرب غياب النقاش الداخلي فالحزب. واضاف ل”كود” باللي هاد الحزب جا لتخليق الحياة العامة. واليوم كلشي ساكت” واضاف “ما يمكنش لينا نعطيو الدروس فالاخلاق العامة. ايلي درنا شي ذنب خاصنا نعتارفو بيه ولا عترفناش بالاخطاء علاش اصلا صالحين”.

ابو الغالي قال ل”كود” باللي انخارط فحزب علي مبادئو. على تصورو للحياة السياسية. على رؤيتو للمغرب” وباللي “اليوم باقي 20 يوم على المؤتمر وكلشي ساكت. ما كاينش لا نقاش”