العرض ماقبل الأول لفيلم الإخوان..فيلم فاشل وتخربيقة كبيرة

تدوينة اليوم

فالعرض ما قبل الأول ديال فيلم “الإخوان”، خطف ادريس شحتان ووليداتو ديال شوف تي في الأضواء من طاليس ورباعتو. هاد الفيلم، اللي خلق الحدث قبل ما يخرج للقاعات السينمائية، مخلط مجلط، وصعيب يتصنف مع “السوليما” المغربية، فما بالك بالسينما اللي كا تحترم نفسها. وشخصيا، ما فهمتش كيفاش الكتابة ديالو خدات 8 سنين كاملة وكيفاش كان طاليس واثق من نفسو وهوا كا يقول للجمهور خلال تقديم الفيلم، باللي كا يبغي يصبر باش يخرج شي حاجة مغيزة؟؟؟ ما فهمتش أيضا كيفاش الرمضاني قرا السيناريو وبقا كا يموت بالضحك، كيفما قال، حيت ما بانش ليا شخصيا شي ضحكككككككك… ولكن اللي بان ليا هو أن الرابح الأكبر فهاد القصة كلها ديال “الإخوان”، هوا ادريس شحتان، واللي كان ذكي جدا ملي اختار ينتج هاد الفيلم ويحقق لطاليس الحلم ديالو كيفما قال. أولا، لأن الفيلم كا يشبه للقناة ديالو “شوف تي في” ولجمهور “شعيبة”، وثانيا، لأن فيه بزاف ديال “البوز”، حيت اللي مشاركين فيه أغلبيتهم نجوم فمواقع التواصل (الراقصة مايا، رضوان الرمضاني، فاطمة التاويل… )، وثالثا لأنه غادي يدخل “ميمّي” حيت فيه جميع مواصفات النجاح التجاري فالقاعات… يعني أنه سيضيف إلى الحسابات البنكية، للناس اللي مشاركين، وعلى رأسهم المنتج والموزع، لكنه لن يضيف شيئا للمسار الفني لطاليس و”إيموراجي” ولا للفن المغربي أو الإبداع… اللي كا نظن أنه ولا كا يتوضع فآخر سلم الأولويات وما بقا حتى شي واحد مسوق ليه…
#الإخوان